شوية حاجات كده جت على بالى بعد حبة كتير يعنى على بال ما بنلاقى وقت نشغل الدماغ فى كل اللى بيحصل الأيام دى ، إن على الرغم من الثورة اللى الشعب كله قام بها و طفش بها الرئيس اللى لأول مرة حكتبها بإيدى و أقول الرئيس السابق إلا أن فى حاجات كده بعد ما الواحد خد نفسه بدأ يتأملها و يركز شوية فيها .

أول حاجة نفسى أعرف مين اللى قال إن الثورة دى لما قامت قامت علشان مبارك يمشى و بح على كده . يعنى مين اللى كان متخيل أن مبارك ده علشان كان يفضل فى وسطنا كل ده و بكل الحب و الود اللى كان خلقه بينا و بينه ده ماكانش معتمد على ملائكة تحميه و تحمى كل اللى هو عايزه يبقى محمى يعنى من الأخر مين اللى قال إن لما مبارك مشى مصر بقت جنة و إن اللى حواليه مش حيمسكوا فى البلد بإيديهم و أسنانهم و رجليهم كمان علشان يحاولوا يحموا نفسهم.

و المصيبة مش بس كده لأ الناس فجأة حسيت أنها بما إن مبارك مشى فأهم حاجة دلوقتى فى البلد هى الفساد و النظافة فجأة الثورة اللى هى المفروض بالمنطق تفضل مستمرة علشان نخلص من بقية الشلة بتاعته بقت متركزة فى حاجتين الفساد و محاكمة ولاد الكلب اللى سرقونا و اللى ظارهين لينا وفى نفس الوقت بينا ننظف شوارعنا و نبيضها .

أنا مش ضد ده و الله العظيم خالص بس فى نفس الوقت مش مع إن الثورة تبقى محصورة فى يا أما نحاكم الفاسدين يا ننضف شوارعنا . طب و بقية مطالبنا يا جدعان ؟؟؟ الرد : لا لا أحنا واثقين فى الجيش و أنه حيظبط الدنيا.

ماشى أنا معاكوا إن الجيش و الشعب إيد واحدة بس فى نفس الوقت عندنا الإيد التانية ، فيه طرف ثالث ابن وسخة مش عايز أن أحنا و الجيش نبقى إيد واحدة ، مش بس كده جو بتاع " مصر رجعت حرة لينا " و " مصر قبل يوم 25 يناير غير بعد يوم 25 " و جو التفاءل ده اللى كلنا عايزينه ده هو بقه اللى هو مش عايزه زى بالظبط زى ما بنشوف كده فى الجزيرة لما يقولولك الإتجاه المعاكس فوالنبى بقه بلاش جو الثقة الزيادة ده و نروح شايلين ايدينا خالص و نقول بره عنا .

و أفكركوا لو نسينا يعنى إن " موقعة الجمل" اللى راح فيها شهداء كتير و مصابين أكتر كان وقتها الجيش موجود فى التحرير وولاد الكلب عرفوا يبهدلونا و صحيح الجيش كان بيحاول يبقى محايد و ساعات كان بيدخل زى ما عمل الظابط ماجد بولس لما أنقذ المتظاهرين من البلطجية لكن ده بيأكد أن بقايا النظام عنده خطط و أفكار مبتكرة دائماً و كفاية الجمال و الحمير اللى هجموا بها على المتظاهرين

فيه حاجة كمان على الرغم من ارتباطى الشخصى بميدان التحرير و قربه من قلبى نظراً لأن الواحد رغم كل الى حصل عاش فيه أيام لا تنسى لكن فى نفس الوقت الثورة مش بس فى ميدان التحرير الثورة فى كل حتة فى مصر و كعادة القاهرة اللى دايماً مستولية على نصيب الأسد فى كل حاجة و تلاقيها كده بقيت مستولية على كله لكن فى حدث زى ده ما ينفعش نمشيها كده لأن فيه أماكن تانية يمكن يكون اللى حصل فيها لو قارناه بميدان التحرير يبقى التحرير ده دلع و حنحس ساعتها قد إيه فيه ظلم.

و مع الوقت بقيت بتعصب شوية من إنى ألاقى على الفيسبوك دعوة لمظاهرة مليونية نقول الجمعة بما أنه اليوم المتفق عليه و يبقى المكان ميدان التحرير طب و بالنسبة لبقية المحافظات مفيش.حتى لما الإعلام بيعمل تغطية يجيبلك ميدان التحرير و كأن مصر كلها بقيت التحرير طبعاً التحرير مهم بس مش هو وبس .

اللى حقوله دلوقتى حاجة حتكون نقطة حساسة عند ناس كتير و أنا واحدة منهم بس الحق حق طبعأ مفيش حد فينا له الحق فى أنه يكلم عن أو بالنيابة عن أى شهيد من الشهداء اللى ماتوا بس اللى مضايقنى أن زى ما خلينا الثورة دى كلها بقت فى الأخر محصورة فى التحرير للأسف عملنا كده مع الشهداء من غير ما نحس ، نسينا إن فيه شهداء تانين ماتوا و بصور بشعة و قذرة و لكن فى الأخر انحسر الشهداء فى مجموعة صور و تم تهميش بقية الشهداء و فى رأى إن زى ما فيه ناس تعبت أن أحنا ندور و نعرف عن شوية من الشهداء علشان نكرمهم فبقية الشهداء حقهم أن أحنا نعمل معاهم كده يا أما يبقى التكريم عام و جامع لكل من راح شهيد الثورة دى من غير ما نحصرهم فى كام صورة اللى مع الوقت بتخلى التعامل يبقى محصور على ناس محددة يتحولوا هما بس للأبطال .

و ما أعتقدش ان يوم ما مبارك مشى كان حد فى نيته أنه يروح بيته و ينام مرتاح و هو عارف كويس أوى إن فيه ناس كتير لسه مظلومين و ناس أكتر بيظلموا فيهم و معيشينهم فى رعب طول الوقت و الناس دى لسه موجودة و اللى خايف على البلد و اقتصادها و الفوضى اللى شايف انها حاصلة فيها مع إنى على المستوى الشخصى دى من أكتر الأوقات اللى كنت حاسة بأمان فيها يعنى كل اللى شايف أن هو ده حال البلد دلوقتى و إن الفترة دى لازم نستنى الجيش يتصرف مادام أحنا واثقين فيه فأنا بقولوه أنه حرام علينا نوقف الثورة دلوقتى ، الثورة دى يمكن تكون أول مرة تخلينا نحس أن أحنا فعلا بنحكم البلد و كفاية بقه كسل و خوف وجو بتاع الشعب و الجيش إيد واحدة وشكراً على كده.

هو أه إيد واحدة بس فى سبيل تحقيق مطالبنا يعنى مش نفوضه ونروح بيتنا لأ نفوضه و أحنا عارفين و هو كمان عارف إن أحنا فوق دماغه لحد ما يعمل اللى أحنا عايزينه و اللى اضربنا و مات ناس مننا علشان نحققه.

مهم أن كله يركز أن مصر تبقى أحلى و أجمل فنعمل مبادرات و توعية و ننظف و كل اللى نفسنا فيه بس كمان الأهم أن أحنا نفضل متماسكين بحقنا و حريتنا علشان هى دى اللى حتخلينا نقدر نخلى مصر حلوة.

و تبقى المصيبة لو اتعاملنا مع الثورة أنها كانت مبارة النهائى فى بطولة أفريقيا و كسبناها و سلاموا عليكوا على كده الموضوع ثورة شعب يريد إسقاط و تغيير النظام بأكمله مش طاغية يمشى و خلاص